Dä letzte Wäg
Dä letzte Wäg, für dä mer bange,
dä letzte Wäg, dä jeder geiht,
dä Wäg, an dem vill Trone hange,
dä Wäg geiht in die Iwigkeit.
Dä letzte Wäge weed mer gefahre,
dann weed mer in de Ähd gedon,
et Hätz hät opgehot zo schlage,
un keiner brengk it mih zom gon.
Mer künne uns ent Weltall schwinge,
Atome künne mer zerschlon,
doch keiner kann dä Dud bezwinge,
wann dä dich röf, dann muss do gon.
Dann kann kei Leed dich mih erfreue,
denn keine Ton dringk in ding Gruff,
un wann ich dausend Ruuse streue,
sie blieve für dich ohne Duff.
Dat leid kann keiner met mir deile,
ston mer am Grav met feuchtem Bleck,
die Zick weed zwar die Wunden heile,
doch iwig bliev en Ketsch zoröck
